سر الأرقام المتداولة عند السوريين

وكالة أوقات الشام الاخبارية / shaamtimes.com

رصد وكالة أوقات الشام الاخبارية:

بعض الأرقام في اللهجة السورية لها أستخدامات مختلفة جداً.. وهي 60 و 100 و 10 و 1000 و 7 و 2..
منبلش:
-الرقم (60):
يستخدم فقط وحصرياً في الشتائم والتوبيخ دوماً عن باقي الأرقام.
مثلاً: (أبن ال60 صرماية).. (أبن 60 كلب).. ما بيقولوا مثلاً أبن 50 كلب.. ولا أبن 70 كلب.. حصراً 60 كلب فقط لا غير.
ويستخدم الرقم (60) أيضا لوصف أسوأ مكان أو وجهة.
مثلاً: (أنقلع حدّك 60 جهنم).. أو (يروح ب 60 داهية).. 40 أو 70 ما بيمشي الحال.
-أما الرقم (100) فيستخدم للتسليمات.
مثلاً: (يا 100 أهلا_وسهلا).. مامنقول يا 50 أهلا وسهلا.. لأ..
(100 السلامة).. (100 وردة بهالطلة)..
وأحياناً يستخدم رقم (100) للمبالغة:
(100 مرة قلنالك ما تعمل هيك).. هوي بكون قايلك مرة ونص أو مرتين..
(100 مرة ناديتك ).. هي بتكون 3 مرات ..
-وأما الرقم (10) فيستخدم لوصف جودة الأشياء أو الأفعال.
(الشغل 10 على 10).. تأتي بمعنى top..
أو (فتح عيونك 10 على 10) يعني أنتبه..
-الرقم (1000) يستخدم تحديداً في التهنئة.
(1000 مبروك).. 100 مبروك ما بيمشي الحال..لازم 1000..
(1000) الحمدلله عالسلامة..
٩٩٩ مبروك كمان قليل
أما الرقم (7) في الوصف فهو ظاهرة_غريبة_جداً.. ويفيد الحيرة الشديدة أو البحث المتواصل والمتعب عن شيء أو شخص ما. مثلاً:
(دخت ال7 دوخات لحد ما لقيت فلان أو هاالغرض الخ…).
كما يستخدم الرقم (7) للتعبير عن النوم العميق..
(ما رح يرد عليك.. شكلو ب سابع نومة)..
أنتبه.. لو بـ سادس نومة كان قام عادي ورد.. بس هي السابع نومة!
أخيراً الرقم (٢):
وهو يعبر عن أطول مدة_زمنية في الكون.. وهي (الساعتين).
(صرلو ساعتين بنفس القصة) هي بتكون ٥ دقايق.. بس الله بيطرح فيهن البركة..
(صرلي ساعتين ناطرك).. (صرلي ساعتين عم فهمك هاالشغلة)..

المصدر: مواقع التواصل الاجتماعي